Струмица, 25 февруари 2014 (МИА) - На Струмичкиот карневал годинава ќе продефилираат над 2.500 маски. Со синоќешното ждребување на распоредот на маските во саботната Интернационална карневалска поворка се финализираа подготовките за „Струмичкиот карневал 2014“.
Годинава, како што истакна претседателот на организациониот одбор,Александар Цицимов,во Интернационалната поворка ќе продефилираат 41 група под маски.
- Вкупниот број учесници во карневалската поворка годинава ќе биде над две и пол илјади учесници од земјата и странство. Вечерашнава ждрепка одлучи маската на здружението „Струма“ од Струмица да биде на чело на колоната, а поворката ќе заврши со маската на гостите од Лубрег, од пријателска Хрватска. Покрај нив, наши гости и годинава ќе бидат повеќе карневалски групи од соседните држави: Турција,Бугарија,Србија,Хрватска, Црна Гора и Албанија, рече Цицимов.
Годинава вторпат Интернационалната карневалска вечер ќе биде в сабота (1-ви март), а како пропратни манифестации на традиционалните тримески празнувања ќе бидат: изборот на принц и принцеза на карневалот (в петок), детскиот карневал(в недела), Фестивалот на афоризам и карикатура, понеделничкиот бел граф (в понеделник), доделување на наградите на најуспешните маски (во вторник), а „Струмичкиот карневал 2014“ традиционално завршува со посетата на домот на армасаните девојки,или популарно наречените „синии“ (в среда).
Организаторите очекуваат рекордна посетеност на ова традиционална карневалска манифестација,која одбележува 20 години од приемот во Интернационалното здружение на карневалски градови.