Тетово, 27 февруари 2014 (МИА) - ДУИ на вонредна седница на централното претседателство вечерва во партиското седиште во Мала Речица донесе одлука за бојкот на следните претседателски избори и отпочнување иницијатива за распуштање на Собранието и организирање предврмени парламентарни избори.
Оваа одлука, според генералниот секретар на партијата Абдилаким Адеми, била донесена по сеопфатната анализа на актуелната политичка состојба и по неподготвеноста на македонскиот политички блок да ја прифати понудата на ДУИ за консензуален претседател.
- ДУИ одлучи да не учествува со свој кандидат на следните претседателски избори, да ги повика Албанците да не поддржат ниту еден кандидат и со тоа да дадат лажен легитимитет на идниот претседател, но истовремено да води активна кампања за промоција на концептот за консензуален претседател се до нејзината конечна реализација. Парламентарната група на ДУИ да поднесе иницијатива за распуштање на Собранието и да се организираат предвремени парламентарни избори, рече Адеми.
ДУИ ги повика сите парламентарни групи да се придружат на нивната иницијатива и да го поддржат предлогот за распуштање на Собранието. Побара сите политички државни фактори, како и граѓаните да дадат свој придонес за организирање слободни, фер и демократски избори за, како што велат, да се докаже дека имаме капацитет и политичка зрелост.