Средба Иванов - МогериниРеафирмирана поддршката на Рим за евроатлантските интеграцииСкопје, 25 јули 2014 (МИА) - Билатералните односи помеѓу Република Македонија и Италијанската Република, политичката и економската соработка, како и состојбите во врска со интеграцијата на земјата во ЕУ и НАТО биле теми на средбата на претседателот на Република Македонија Ѓорге Иванов, со италијанската министерка за надворешни работи Федерика Могерини.
Како што соопшти кабинетот на претседателот, Иванов посакувајќи успешно претседавање на Италијанската Република со ЕУ, се заблагодари за досегашната италијанска поддршка за интегрирањето на Македонија во европските и евро-атлантските структури, и изрази надеж дека таа ќе продолжи и во иднина.
Во тој контекст, италијанската министерка беше запознаена со статус-кво состојбата на Република Македонија, која е блокирана и во ЕУ и во НАТО, и за разговорите за разликата околу името, како и за проактивниот и конструктивен пристап на нашата земја во унапредувањето на добрососедските односи.
- Иванов истакна дека Република Македонија бара почитување на меѓународното право и на меѓународните обврски, и во таа насока очекува поддршка од Италија и од земјите – членки на ЕУ, кои воедно се и членки на НАТО, дополнувајќи дека е потребно и во нашиот случај да се применат позитивните примери од регионот, на паралелно движење на преговорите со надминувањето на билатералната разлика, стои во соопштението.
Во однос на јакнењето на регионалната соработка, претседателот Иванов истакна дека Република Македонија од Италијанската Република очекува поддршка и во настојувањата за членство во Јадранско-јонската иницијатива.
Министерката Могерини, нагласи дека Италијанската Република како претседавач со ЕУ дава целосна поддршка по однос на евроатлантските интеграции на Република Македонија, додавајќи дека проширувањето останува високо на агендата на италијанското претседателство.
Таа ја истакна подготвеноста на Италијанската Република да помогне во интеграцијата на земјите од регионот во Европската унија и во НАТО и изрази надеж дека за време на шестмесечното претседателство ќе биде направен чекор напред во интеграцијата на Република Македонија.
На средбата, како што се наведува, беше заемно констатирано дека односите меѓу двете земји се традиционално пријателски, со висок степен на разбирање и доверба, и беше изразена заедничката определба за постојано унапредување и интензивирање на политичкиот дијалог и понатамошно динамизирање на билатералната и економската соработка.
|