Скопје, 6 октомври 2014 (МИА) - Основниот суд Скопје 1 денеска му изрече 15 години затворска казна на поранешниот разузнавач Марјан Ефремов за случајот „Шпион“, додека поранешниот полициски генерал Горан Стојков е осуден на девет години затвор.
Поранешниот директор на Агенцијата за спречување перење пари, Ване Цветанов е осуден на три години казна затвор, контраразузнавачот Александар Диневски на 4,5 години затвор, а Цветан Дамјановски доби 6,5 години затвор. Останатите обвинети во овој случај добија затворски казни од една до четири години, а условна казна во траење од пет години му е изречена на обвинетиот Слободан Милошевски.
Претходно, во завршните зборови обвинетите тврдеа дека не се виновни и побараа од Судот да ги ослободи од кривична одговорност.
Во судскиот процес „Шпион“ беа обвинети 19 луѓе за злосторничко здружување, шпионажа, злоупотреба на службената положба, уцена, измама и недозволено поседување на оружје.