Џоплин, 24 мај 2011 (МИА) - Во торнадото кое го погоди градот Џоплин во американската сојузна држава Мисури загинаа најмалку 116 луѓе, а властите стравуваат дека бројот на жртвите ќе се зголеми и дека ова е можеби најсмртоносното торнадо досега.
- Три четвртини од градот со околу 50.000 жители се уништени, така што бројот на жртвите ќе биде многу поголем, изјави портпаролот на гувернерот на Мисури Кристи Бертелсон.
Спасувачки екипи од целата област се испратени во Џоплин за пребарување на урнатините, а претставникот на градските власти Марк Рор изјави дека бројот на повредените се уште не е утврден.
Гувернерот на Мисури Џеј Никсон прогласи вонредна состојба, а американскиот претседател Барак обама, кој се наоѓа во посета на Европа, им изрази сочувство на семејствата на загинатите.
Според податоците на Националната администрација за океани и атмосфера, најголем број жртви од торнадо е забележан во Флинт, во државата Мичиген, во 1953 година кога загинале 116 лица.