Годинешниот избор за Песна на Евровизија е посебен по многу нешта. Во Дизелдорф, исто како и во Белград во 2008. година ќе настапат рекордни 43 земји учеснички. Проект менаџер е Ситсе Бакер.
Повторно на сцената нема да има претставници од: Андора, Црна Гора и Луксембург, но по 14 години се враќа Италија. По Евровизија во Истанбул во 2004. година, повторно домаќин е град кој не е главен град на државата домаќин. Германија по трет пат го организира изборот по оној во 1957. во Франкфурт и во 1983. во Минхен.
Инаку, Дизелдорф е главен град на покраината Северна Рајна Вестфалија во која живеат 10 милиони жители. Лежи на реката Рајна и е дом на 600 илјади жители. Градот претставува центар на маркетингот и модата во Германија. Во него се наоѓа за многумина најелитната улица во државата, „Konigsallee”. Карактеристика на градот е и Стариот дел кој ја има најдолгата улица во светот со непрекинат ред кафулиња и ресторани.
Интересен беше неговиот избор за град домаќин на Евровизија. По минатогодишната победа на Германија, кандидати за домаќин беа и главниот град Берлин, потоа Хамбург и Хановер. Меѓутоа, Дизелдроф беше избран заради неговата местоположба, капацитетите и Арената „Фортуна” каде ќе се одржи изборот за Песна на Евровизија. Таа преставува повеќенаменски објект кој има капацитет да прими 54.400 гледачи. За Евровизија просторот е преадаптиран и ќе има капацитет за 26.000 гледачи. Градена е од 2002-2004. година за да го замени „Рајн” стадионот. Досега во неа настапувале: Мадона, Џон Бон Џови, Депеш Мод, Ди Тотен Хозен, Херберт Грунемаер, Брус Спрингстин и други. Во однос на влезните билети, цените се движат од 19-69 Евра за полуфиналните вечери, а за финалната вечер од 89-189 Евра. Има и тнр. „бизнис” места кои за полуфиналните вечери чинат 495, односно 795 Евра за финалето. Водителското трио го сочинуваат двете дами: Анке Енгелке и Јудит Ракерс на кои друштво ќе им прави Штефан Рааб.