Конечно, вечерва во 21 часот ќе започне втората полуфинална вечер на која под реден број 11 ќе настапи македонскиот претставник, Влатко Илиевски со песната „Русинка“.
ИДИВИДИ ексклузивно ви ги пренесува речиси сите детали поврзани со настапот на Влатко.
Првите два стиха ќе бидат отпеани на англиски, а следните на македонски јазик. Петочлената екипа која ќе биде на сцената ќе носи облека во впечатлива бела боја. Влатко ќе носи потемно палто со што се создава убав контраст. Анимациите на задниот екран ќе потсетуваат на аквариум чии четири страни постојано се вртат и ја преставуваат студената ладна зима и топлите букви од зборот музика.
Според колегите новинари со кои до овој момент разговаравме, сметаат дека „Русинка“ ќе се пласира во финалето. Посебно песната им се допаѓа на Шпанците, Израелците и Русите, а токму од нив очекуваме повеќе гласови.
Конкуренцијата е многу силна и навистина е различно чувството кога песните се слушаат во живо. Позитивно изненади Бугарија и Словенија (кои би требало да изненадат и со пласман во финале) со квалитетните интерпретации, а разочара Шведска и Естонија кои ги сметаа за фаворити дури и за победа. После се, финалисти од втората вечер покрај Македонија, Шведска и Естонија, би требало да бидат и: Молдавија, Израел (иако Дана не пее најдобро), Романија, Данска, Австрија, Босна и Херцеговина и Ирска.
Еве што ни одговори Влатко пред вечерашниот настап.
Неколку пати се шеташе низ Дизелдорф како ти се допадна?
Веќе сум заљубен во градот. Во центарот се е близу и за 10 минути секаде се стигнува.
Како се чувствуваш пред настапот на изборот за Песна на Евровизија?
Одлично, подготвен сум и едвај чекам да излеземе на сцената. Целата екипа се чувствува одлично и сите размислуваат позитивно.
Кои се твоите очекувања?
Пред се, очекувам да ја отпеам „Русинка” прецизно и точно. Опуштен сум и за пласман не сакам да зборувам. Секако дека очекувам да се пласираме во финалето, а за понатаму ќе видиме. Имавме гостувања во неколку земји учеснички и очекуваме повратен одговор.
Многу среќа и ИДИВИДИ стиска палци за тебе!
Благодарам и поздрав од Дизелдорф до сите читатели на ИДИВИДИ!