Македонски Телеком АД Скопје од 17-ти овој месец ја воведува услугата Телевизија преку интернет протокол IPTV, под брендот
MaxTV. Комерцијалниот старт на услугата ќе биде дел од триплплеј пакетот, сервис со кој компанијата исто така првпат настапува на пазарот, и ќе нуди, покрај IPTV, фиксна телефонија и интернет.
Раководството на компанијата денеска на прес-конференција информира дека корисниците ќе добиваат три услуги на иста сметка, преку два пакета: 3 Мах Комфорт по цена од 1.999 денари и 3 Мах Комфорт плус по цена од 2.499 денари. Ќе се наплаќа и еднократен надомест од 1.299 денари за инсталирање на потребниот приклучок и опрема.
Според главниот извршен директор на Македонски Телеком, Николај Бекерс со воведувањето на
MaxTV услугата, граѓаните на Македонија ќе уживаат во производите и бенефитите на најсовремената технологија и ќе имаат дополнителни опции кои стандардната телевизија не е во можност да ги понуди.
- Со
MaxTV услугата се добиваат различни мултимедијални и интерактивни телевизиски и видео содржини со многу подобар квалитет на ТВ сигналот. Телевизијата нуди единствена опција за снимање на програмите кога корисникот не е дома, паузирање на програмите дури и кога се во живо, враќање наназад на програмата што се гледа и други содржини, објасни Манче Трендафилов, од раководството на Македонски телеком.
Тој информира дека услугата
MaxTV овозможува избор на видео содржини на барање на корисникот, ТВ водич за содржината на програмата за 14 дена, можност за контрола и ограничување на содржини што не се прилагодени за деца, како и снимање разновидни содржини, со меморија од 160 гигабајти.
Пакетот 3 Мах комфорт, содржи интернет од 25 гигабајти сообраќај, 500 минути разговор на локално и национално ниво, 20 проценти попуст на меѓународни разговори кон мобилните мрежи, бесплатни меѓународни разговори кон 10 земји и 70 телевизиски канали. Содржината на 3 Мах Комфорт плус пакетот опфаќа неограничен интернет и разговори во мрежата на Телеком, 30 проценти попуст на меѓународни разговори и 20 проценти попуст на разговорите кон мобилните мрежи, како и 70 телевизиски канали.