Отворен 41. Меѓународен семинар за македонски јазик, литература и култура Охрид, 11 август (МИА) - Во Конгресниот центар во Охрид денеска беше отворен 41-виот Меѓународен семинар за македонски јазик, литература и култура, на кој ќе учествуваат околу сто слушатели од 22 држави.
Ректорот на Универзитетот „Свети Кирил и Методиј“ Ѓорги Мартиновски на отворањето на Семинарот истакна дека оваа манифестација претставува значајно остварување за Универзитетот, за Охрид и за целата држава, оттаму што повеќе од четири децении оваа манифестација претставува голема заложба во севкупното претставување на македонската национална култура во светот.
- Меѓународниот семинар преку својата стручно научна дејност во областа на македонистиката од своите скромни почетоци до денес прерасна во единствена наставна научна и културна институција од ваков вид во Македонија и стана ценет славистички центар, рече Мартиновски, нагласувајќи дека Семинарот преку своите активности успеал да создаде бројни познавачи на македонскиот јазик, а со тоа, како што рече, Универзитетот и Република Македонија се здобија со бројни амбасадори, лобисти и верни пријатели во светот.
- Владата на Република Македонија ја прогласи 2008-ма за година на македонскиот јазик, а Универзитетот „Свети Кирил и Методиј“ преку сиот свој академски потенцијал ја поддржува оваа значајна државна мнифестација. Универзитетот активно ќе учествува и во организирањето на првиот Меѓународен славистички конгрес закажан за септември кој е еден од најголемите научни институции во деценијата, истакна Мартиновски.
Директорот на Семинарот Емилија Црвенковска за научниот собир што ќе трае до 28 август рече дека е предвидена богата програма со предавачи, голем број академци, истакнати македонски научни и културни работници.
Во склоп на Семинарот ќе биде одржана и 35-тата научна конференција во чија работа досега имаат учествувано повеќе од 1.200 претставници од 50 светски универзитетски центри. Вообичаени теми во рамките на Семинарот се литературната и лингвистичката секција, македонскиот јазик и литература наспроти другите литератури и јазици, посебна тема посветена на стогодишнината од раѓањето на Коста Рацин, како и други бројни поспецифични теми од областа на лингвистиката.
Во рамките на првиот ден од работата на Семинарот беше промовиран зборникот „Компаративна фонологија и морфологија на македонскиот јазик“ од Франтишек Вацлав Мареш, познат славист од Виенскиот универзитет. Како што изјави професорот по славистика Влоѓимјеж Пјанка, инаку и самиот колега на починатиот Мареш, станува збор за превод на сите трудови на Мареш што се однесуваат на македонскиот јазик и македонската култура во поширока смисла.
- Тоа се темелни трудови за македонистиката и македонската лингвистика, бидејќи во трудовите се опфатени не само македонистички проблеми, туку и посебноста на македонскиот јазик настанат од старословенскиот. Мареш се занимаваше и со старословенскиот јазик, беше редактор на двата големи речника на старословенски јазик - едниот завршен и објавен во Прага и вториот незавршен во Загреб, на кој се уште се работи, истакна угледниот славист и македонист Пјанка, кој за овој семинар има подготвено пет авторски реферати.
Првпат по завршувањето на Семинарот ќе се одржи тридневна македонистичка конференција, потоа и научна конференција што традиционално се одржува секоја година, а од 10 до 16 сетпември Охрид ќе биде домаќин на Светскиот славистички конгрес.
|