Електронските цигари би требало да бидат забранети поради нивната потенцијална штетност по здравјето, барем додека се покаже спротивното, тврдат научниците од Универзитетот Калифорнија.
Нивното истражување само го „потпалува“ веќе постојното контроверзно мислење околу цигарите на батерии, кои содржат никотин, различни вкусови и уште неколку хемикалии. Проблемот се појави кога оваа есен, американската Организација за храна и лекови, „фати“ пет дистрибутери на е-цигари во помалку сомнителни производни методи, како и во лажно рекламирање кое тврди дека е-цигарите им помагаат на луѓето во престанувањето со пушењето.
Студијата пронајде многу недостатоци во електронските цигари, како и потенцијални опасности по здравјето. Истражувачите проучија шест различни брендови на електронски цигари кои во моментов можат да се најдат на пазарот и најдоа многу минуси.
Резултати од истражувањето
Имено, се наведува дека течноста која содржи никотин, често знае да протече надвор од цигарата, исто така е-цигарата нема рок на траење, нема предупредување околу опасноста по здравјето, а за цигарите за кои се тврди дека воопшто не содржат никотин се идентични како и оние кои содржат големи дози на никотин.
Сите електронски цигари имаат нејасна и недоволно точно опишана количина на никотин, од 6 па се до 24 милиграми. Ниту еден производ не нуди точно објаснување на благотворното дејство на цигарите, за кои на интернет, производителите тврдат дека го има.