Кинеските хирурзи успеале да ја повратат функцијата на раката на еден пациент чија дланка му била отсечена при несреќа во фабрика. Дланката речиси еден месец била прицврстена на неговата нога, пред повторно да ја поврзат со остатокот на неговата рака.
Операцијата ја извршиле во болница во градот Чангша во централна Кина.
Пациентот, кој е претставен само како г-ин Жоу, имал сериозни повреди по што хирурзите заклучиле дека е потребно време за сите нерви и лигаменти да закрепнат. Сепак, едноставното прешивање на дланката значело дека Жоу веројатно никогаш веќе нема да може да ја користи.
- Под нормална температура, отсечениот прст мора да добие свежа крв во рок од 10 часа, но тоа време е уште пократко во случај на отсечен екстремитет, изјавил д-р Танг Јују, кој го оперирал г-ин Жоу.
Поради тоа тимот на хирурзи одлучиле најпрво дланката да ја прицврстат за ногата, каде што ја одржувале во живот цел месец, а потоа со друга операција, дланката повторно ја прицврстиле на раката. Жоу веќе може полека да ги мрда прстите, а лекарите предвидуваат дека по рехабилитацијата, раката ќе биде во потполна функција.