Кивањето е природна појава која најчесто се јавува непредвидено, заради што знае да биде мошне непријатна доколку имаме луѓе околу нас. Но, со оглед на тоа што преку овој процес организмот го прочистува телото од нечистотиите, неговото спречување може да ве доведе до опасност!
Додека киваме, воздухот низ нашите ноздри лета со брзина од 160 километри на час, а доколку го стопираме, целиот притисок се префрла на некој друг дел од телото, кој може да настрада, предупредуваат лекарите.
Имено, со стопирањето притисокот се сели во ушите, каде може да доведе до оштетување, како на пример, пукање на ушното тапанче. Може да предизвика и загуба на слухот и вртоглавица, која нема да престане за брзо.
Исто така, може да се случи да настрадаат и крвните капилари во очите, односно да се распукаат заради притисокот, а се случува и да дојде до оштетување на дијафрагмата.
Силниот налет кој се прекинува со стопирање на кивањето е потенцијална опасност од повреда на вратот, како и отворање на рани кај оние кои имаат неодамна направено операција на синусите.
Во најлош случај доаѓа до пукање на вени во мозокот и мозочен удар, што може да биде смртоносно.
Затоа, доколку ви дојде да кивнете во јавност, немојте да се срамите, бидејќи цената која може да ја платите не е вредна за тоа. Наместо да се воздржувате, ставете марамче на носот и кивнете како што треба, а доколку не успеете да го извадите марамчето од ташна или џеб, устата покријте ја со дланка.