Анорексијата и булимијата се две добро познати нарушувања во исхраната, додека за орторексијата речиси ништо не се знае. Оваа патологија се однесува на личностите кај кои грижата за здрава храна прераснува во опсесија.
Важно е да консумирате по пет различни овошки дневно, да не претерувате со месото, да избегнувате палмино масло...Ова и многу други, иако добри совети, може да станат непријател на нашето здравје, доколку потребата за внесување здрава храна се претвори во болест, наречена орторексија.
Сè повеќе луѓе сакаат да го контролираат она што го јадат и тоа во основа е позитивно. Но, проблемот настанува кога изборот на храната станува тешкотија од која не можеме да се откажеме.
Кај орторексичните личности, желбата за здрава храна прераснува во опсесија и тие почнуваат да развиваат загрижувачки психички симптоми. Како и во случајот со анорексијата и булимијата, храната презема контрола врз нивните животи. Како и кај „класичните“ нарушувања во исхраната и во овој случај пациентот има страв да не изеде нешто што е лошо за неговото здравје, а со тоа почнува да се создава стрес и анксиозност.
Изразот орторексија се уште не е продлабочен, а лекарите бараат оваа дијагноза формално да почне да им се поставува на пациентите.