Истражувачи од University of Virginia креирале хибриден ген наречен Magneto, кој што може да ги активира електричните кола во мозокот и да влијае на однесувањето на глувците.
Досега, научно е докажано и покажано дека нервниот систем реагира на разни методи на стимулација како оптогенетска (биолошка техника која инволвира користење на светлина за контролирање на клетките кои се генетски модифицирани да се осетливи на светлина) и кемогенетска (процеси каде макромолекули со лекови можат генетски да се изменат за да имаат интеракција со претходно непрепознатливи за организмот мали молекули). Меѓутоа, и двете методи имаат потешкотии да „стигнат“ до мозокот.
Најновата метода со користење на магнетни полиња, го нема тој проблем. Научниците креирале нов јонски канал кој реагира на магнети, така што постоечкиот јонски канал наречен TRPV4 (кој реагира на механички притисок) го споиле со ген на ferritin (протеин кој се сврзува со железо и реагира на екстерни магнети)
Со тоа тие креирале хибриден протеин кој го нарекле Magneto, кој реагира на магнетните полиња во клетките. Така, кога ќе се доближи магнет до клетки кои го носат овој протеин, тој ги отвора јонските канали предизвикувајќи серија на настани кои доведуваат до активирање на мозочните сигнали.
Тимот на истражувачи продолжуваат со развивање на оваа метода за која велат дека значително ќе помогне за подобро разбирање на нервниот развој, функција и патологија.