Отстранувањето на тумори од мозокот е деликатна задача, која доколку не се изведе правилно може да има катастрофални последици како што се оштетување на мозокот, што може да предизвика и оштетување на некои моторни функции или неуспех во контролирање на функција на некои витални органи. Поради тоа, мексиканскиот истражувач David Oliva Uribe од Vrije Universiteit Brussel дизајнирал „паметен“ скалпел кој определува дали ткивото врз кое се работи е здраво или туморно.
Намената на уредот е да се користи во операционите сали, исклучиво кога туморот на мозокот е веќе дијагностициран и единствена солуција е да се отстрани. Тој има големина и форма на скалпер, но врвот е сферичен со дијаметар помал од еден милиметар. Во него има интегрирано сензор кој по допир со површината на која треба да се сече, го предупредува неврохирургот со визуелни и аудио информации во врска со статусот на ткивото. Резултатите се добиваат за помалку од половина секунда, што е од исклучително значење за време на една операција (кога секунда помалку или повеќе може да значи живот). Овој скалпер е дизајниран да ги лоцира туморите во раната фаза – кога се видливи на MRI (магнетна резонанца), но не и во операционата сала, бидејќи нивните физички карактеристики се слични како оние на здравото ткиво, што ги прави тешки да се спознаат/лоцираат.
На дизајнот е работено 6 години – механичките и сензорни компоненти се произведени во University of Hannover и специјализирани неврохируршки болници, додека дигиталното процесирање било развиено во Free University of Brussels, во Белгија.
Во иднина се планира оваа технологија да се минијатуризира и адаптира за да може да детектира тумори и во други делови на телото како што се стомакот и цревата, бидејќи во тој случај би требало да се вметне во ендоскоп. Како понатамошна можност се спомнува и нејзино вградување во роботи кои асистираат при операции.