Вештачката интелигенција (AI, Artificial Intelligence) е едно од најголемите достигнувања на 21-виот век. Меѓу другото, АI машините се способни да преведуваат зборови во слики, да играат друштвени игри победувајќи врвни противници, и др. Сега, способни се и да детектираат канцер.
Истражувачи од UCLA создале нов микроскоп кој користи AI технологија за детектирање на канцерогени клетки во крв, побрзо и попрецизно од сите останати микроскопи – може да анализира 36 милиони слики секоја секунда, без да ги оштети примероците крв.
За споредба, останатите техники за тоа да се постигне се или со користење на тумор маркери кои се додаваат на примероците крв (кои потоа биолошки ги обележуваат оштетените канцерогени клетки) и кои во тој процес го уништуваат примерокот кој потоа не може повторно да се тестира, или со идентификување на клетките без маркери, при што често се случува погрешна идентификација.
Новиот микроскоп користи технологијата наречена „photonic time stretch”, што всушност е снимање на слики од крвните клетки со помош на ласери, притоа идентификувајќи 16 нивни физички карактеристики како што се биомасата, големината, грануларноста и сл. Ласерите се „испукуваат“ на начин како што функционира блиц на фотоапаратите, со тоа што самиот процес трае неколку наносекунди. Потоа, сите тие податоци AI системот ги компарира со останатите во огромната база, што му овозможува успешност во детектирањето од 95%.