Биоинформатичка компанија наречена Insilico Medicine го претсави Aging AI, онлајн платформа која може да ја погоди староста на личноста користејќи податоци само од крвната слика.
Истражувачите од Insilico Medicine дизајнирале модуларен состав од 21 длабоки невронски мрежи (Deep Neural Networks/DNN) со различна структура, способни да ја погодат староста со точност од околу 80%. Во истражувачката студија се спомнуваат пет најважни маркери со чија помош се вршат предвидувањата: албумин, гликоза, алкална фосфатаза, уреа, и еритроцити.
Бидејќи невронските мрежи често пати бараат огромна количина на податоци за да ги подобрат перформансите, истражувачите во студијата користеле 60 000 примероци (селектирани од над милион) на крвна биохемија и тестови за пребројување на крвните клетки превземени од рутински здравствени прегледи правени во најголемата независна лаборатори во источна Европа, Invitro Laboratories, поврзани хронолошки со староста и полот на тест субјектите.
Овој состав потоа е искористен за напојување на вештачката интелигенција наречена Aging AI, каде што корисниците можат да впишат податоци од сопствените крвни тестови, и во однос на тие податоци, AI-то ќе го погоди нивниот пол и старост.