Егзоскелет како третман за Паркинсонова болест

Иако постојано се работи на нови начини за третирање на симптомите од Паркинсоновата болест, опциите се лимитирани кога станува прашање за секојдневното тресење, т.е треморот. Поради тоа, истражувачи од Imperial College London развиле егзоскелет кој се поставува на раката и кој „препознава“ кога корисникот се спрема да направи некој потег кој побарува стабилност и прецизност на движењето, при што се активира за да го ублажи тресењето. Тоа го прави така што ја турка раката со вибрирачки потези кои го негираат треморот.

Иако ова не е баш прв уред со оваа намена (првите се развиваат уште од 2007-ма), уникатен е поради специјално развиениот софтвер за него, кој егзоскелетот го активира по потреба во зависност од активностите на корисникот. Вака се редуцира потрошувачката, а и на овој начин уредот е далеку попрактичен бидејќи му е потребно многу помалку моќ за да работи.

Егзоскелетот е изработен со 3D принтана пластична рамка на која и се додадени два малечки серво мотори (кај лактот и зглобот), кои имаат вградено позициони сензори, а вметнати се и акцелерометар и жироскоп на задниот дел од шаката. Сето ова тежи вкупно само 350 грама.

Според податоците добиени од досегашното истражување, прототипот на овој егзоскелет може да распознае и разликува разни активности со 70% точност. Со постојано обновување на софтверот, тој ќе може попрецизно да ги детектира движењата, на пример ќе препознае дали корисникот јаде, или ја користи раката за куцање на компјутер, и сл.