Успешно изведена првата трансплантација на две дланки

Во англискиот град Донкастер успешно е изведена првата трансплантација на двете дланки кај еден пациент.

Новите дланки ги доби Крис Кинг (57), во болницата „Лидс Џенерал Инфирмари“, кој без нив останал пред три години во несреќа што му се случила на работното место.

Тимот лекари бил предводен од професор Сајмон Кеј, пренесе Би-Би-Си. Професор Кеј истакна дека потфатот бил потежок и посложен од операцијата на внатрешни органи и додаде дека еден ден тој и Кинг ќе се ракуваат.

- Не можев да добијам ништо подобро, повторно се чувствувам комплетен, рече Кинг и додаде дека не може да ја сокрие радоста што веќе имал неколку мали движења со новите дланки и што повторно ќе може да го држи шишето пиво и да носи кошули.

Иако новите дланки, кои ги добил од донатор, совршено му прилегаат, неговите први впечатоци се дека сега рацете му изгледаат некако поголеми.