Тим научници од Универзитетот во Квинсленд создале генетска терапија за да ја исклучат реакцијата на имунолошкиот систем одговорна за астмата, а тие веруваат дека нивната техника би можела и перманентно да ги „замолчи“ реакциите на вообичаените алергени како отровот од пчели, кикирики и школки.
Досега, тестовите вршени врз животни биле успешни, а доколку истото се случи и кај луѓето, би можел да се развие еднократен третман за пациентите со астма и разни алергии.
Техниката всушност ја брише меморијата на клетките кои ги предизвикуваат алергиските реакции со помош на генетски модифицирани матични клетки кои се отпорни на алергени. Се земаат крвни матични клетки, во нив се внесува генот кој го регулира алергенскиот протеин, и тие потоа се внесуваат во примателот. Тие нови клетки потоа создаваа нови крвни клетки програмирани да таргетираат специфични имунолошки клетки кои ја „исклучуваат“ алергиската реакција.
Според светската здравствена организација, 235 милиони луѓе низ светот имаат астма, која е највообичаената хронична детска болест, а само во САД нејзиното лечење чини вкупно 56 милијарди долари во медицински сметки.
Целта е по тестирањето врз луѓе, доколку се покаже подеднакво успешно, да се развие еднократна терапија во форма на инјекција која би ги заменила сегашните краткотрајни третмани за алергии, чија ефикасност значително варира.