FlatScope е иновативен имплант за кој научниците се надеваат дека еден ден ќе може да ги испраќа сензорните информации директно во мозокот – избегнувајќи ја потребата да се „поправат“ пореметувањата на очите или ушите за да се поврати видот или слухот.
Покрај ова, тимот кој стои зад FlatScope се надева дека уредот има потенцијал да ја снима мозочната активност многу подетално отколку што тоа сега е возможно, притоа набљудувајќи и стимулирајќи неколку милиони неврони во кортексот.
Истражувачите го развиваат FlatScope во партнерство со DARPA, како дел од NESD (Neural Engineering System Design/Дизајн на нервни инженерски системи) програмата, со цел да се развие потполно функционален имплантабилен систем кој овозможува комуникација помеѓу мозокот и дигиталниот свет - интерфејс кој би ги конвертирал електрохемиското сигнализирање е кое го користат невроните во мозокот во единици и нули (јазикот на информатичката технологија).
Доколку се усоврши, оваа технологија, на пример, би им овозможила на луѓето со оштетен вид, како и на слепите, повторно да го видат светот преку камера на нивната кошула.
Сега засега тимот има изработено прототип кој се поставува врз мозокот и детектира оптички сигнали од невроните во кортексот, а кога FlatScope ќе се усоврши, во него ќе можат да се вградат илјадници електроди кои ќе го анализираат мозокот – во споредба со 16, колку што имаат најдобрите денешни системи од овој вид.
Тимот истражувачи исто така соработува со експерти за биолуминисценција, со цел да се изнајде начин невроните да се натераат да испуштаат фотони кога ќе се активираат, креирајќи своевидно „лајт-шоу“ кое ќе открие повеќе за внатрешните функции на мозокот.
Покрај останатите проблеми како создавање на алгоритми кои ќе бидат способни да ги анализираат податоците од мозокот, една од пречките е и изнаоѓањето начин за безжично напојување на уредот, како и безжично испраќање и примање на податоците.
Тимот веќе има добиено средства за наредните 4 години, а целта ќе биде усовршување на интерфејсот за да оштетените човечки сетила можат да се заменат со дигитални еквиваленти.