Според студија направена во Cedars-Sinai институтот за срцеви заболувања, матичните клетки земени од помлади срца можат да се користат за да го повратат процесот на стареење, предизвикувајќи постарите срца да функционираат како помлади.
Студијата ги опсервирала ефектите од срцевите матични клетки врз разни аспекти на срцето, вклучувајќи ја и неговата функција и структура.
Истражувачите земале CDC клетки од новородени глувци и ги инјектирале во срцата на постари, додека друга контролна група постари глувци била инјектирана со плацебо, т.е. салин.
Потоа, врз сите нив биле направени тестови на крвта, ехо кардиографски и други тестови, како и стрес тест на подвижна трака, а еден месец подоцна врз постарите групи било извршено уште едно тестирање.
Кај глувците на кои им биле вбризгани помладите клетки биле забележани разни бенефиции во споредба со оние на кој им бил вбризган салин. Тие имале подобрена функционалност на срцето, можеле да вежбаат 20% подолго, влакната им раснеле побргу и имале подолги теломери на срцевите клетки. Ова е важно бидејќи теломерите се наоѓаат на краевите на хромозомите и нивното скратување е поврзано со процесот на стареење.
Тестовите врз глувците покажале дека овие матични клетки предизвикале срцево и системско подмладување, но сепак претстои уште многу работа пред овој третман против стареење да биде тестиран врз луѓе. Истражувачите кои биле вклучени во студијава велат дека сè уште не е јасно дали клетките воопшто го продолжуваат животниот век на глувците, или само го подмладуваат срцето во старото тело.