Нов малечок „минималистички робот“ може да постигне комплексна серија на движења и во иднина би можел да „патролира“ внатре во телото, според истражувачите од Макс Планк институтот за интелигентни системи во Штутгарт, Германија.
Овој робот инспириран од гасениците, меките ларви, но и медузите може да скока, плива, чекори или ползи низ сува и влажна околина, а е со големина скоро колку едно зрно ориз.
Како го постигнува сето тоа без да има било какви екстремитети?
Германските истражувачи користеле екстерни магнетни полиња за да постигнат притисок врз магнетните честички во неговото тело, менувајќи му ја формата. Оваа деформација му овозможува на роботот да скока преку пречки, ползи низ тунели и слично, како и да подигнува, преместува и спушта објекти.
Сите овие способности ќе се тестираат штом роботот е спремен да се внесе во човечкото тело и да испорачува лекови до цели до кои инаку би било тешко да се дојде без операција.
Тоа значи дека во иднина ваквите роботи би се користело за минимално инвазивни медицински апликации во внатрешноста на телото, а во него би се внесувал преку голтање или преку отвор на кожата, по што самиот би си го нашол патот до, на пример, дигестивниот или уринарен тракт, стомачната шуплина или површината на срцето.
Оваа „роботска гасеница“ сега засега е тестирана врз модел на вештачки стомак, и врз ткиво од кокошка.