Говорот е моќна алатка, но за жал не сите можат да го користат.
Во таквите случаи, технологијата може значително да помогне – а сега е креиран нов алгоритам кој пораките од мозокот наменети за мускулите ги претвара во звуци т.е говор.
Конвертирањето на комплексна мешавина од информации испратени од мозокот до мноштво делови на телото во звук не е воопшто едноставно. Усните, јазикот, грлото, гркланот и дијафрагмата сите мора да работат заедно во скоро совршена усогласеност за да се изговорат дури и наједноставни фрази.
Истражувачите од Универзитетот на Калифорнија Сан Франциско (UCSF) успеале овие невролошки процеси да ги искористат да креираат вештачки говор.
Тоа го направиле со помош на декодирање на сигналите кои мозокот ги испраќа до „вокалната опрема“ на телото, и потоа нивно претворање во видови на артикулации потребни за создавање на звуци.
Во принцип, преведувањето на мускулните движења било полесен начин да се стигне до крајната цел, наместо преведување на секој посебен сигнал од мозокот.
За да ја тестираат оваа идеја, истражувачите регрутирале 5 доброволци за кои веќе бил закажана операција за третирање на нивната хронична епилепсија.
Како дел од процедурата, на пациентите им била имплантирана мрежа електроди поставена на површината на мозокот, со чија помош се издвојувале невролошките пораки насочени кон органите кои го сочинуваат системот за говор. Исто така им биле ставени сензори на јазикот, забите и усните, за да се следат нивните движења.
Потоа, субјектите читале стотици зборови и реченици од база на податоци за препознавање на говор, како и бројни делови од познати приказни како заспаната убавица и др.
За да се исклучи можноста сигналите да се резултат од слушање на сопствениот глас, еден доброволец само ја движел устата додека читал, не испуштајќи звуци.
Потоа, мозочните сигнали генерирани исклучиво за контролирање на движењето на усните, јазикот и вилицата биле издвоени од останатите и од нив бил креиран специјално дизајниран алгоритам – мапа на движења кои ги формираат звуците кои требало да бидат генерирани од синтетизатор на говор.
Крајниот резултат бил извонреден, иако технологијата треба уште многу да се истражува и усовршува со цел еден ден да се создадат неврални импланти кои ќе бидат одобрени за масовна употреба.