Вештачка интелигенција може да предвиди рак на панкреас 3 години пред лекарите

Алгоритмите на вештачката интелигенција можат да направат скрининг за рак на панкреасот и да предвидат дали пациентите ќе ја развијат болеста три години пред лекарот да ја постави истата дијагноза, покажува истражување објавено во Nature.

Ракот на панкреасот важи за еден од најсмртоносните типови на рак каде стапката на преживување на пет години во просек изнесува 12 проценти. Научниците од Данска и САД веруваат дека вештачката интелигенција би можела да им помогне на лекарите во откривање на ракот на панкреасот во раните фази, доколку софтверот може со сигурност да предвиди кои пациенти се изложени на поголем ризик за да ја развијат болеста.

За потребите на истражувањето научниците обучиле алгоритми за вештачка интелигенција да анализираат милиони медицински досиеја добиени во данскиот национален регистар на пациенти и во складиштето за корпоративни податоци поврзани со ветераните на САД. Вештачката интелигенција имала за цел да ги поврзе кодовите за дијагностицирање - етикети што ги користат болниците кои опишуваат различни медицински состојби - со ракот на панкреасот.

Некои дијагностички кодови за жолтица, абдоминална и карлична болка, губење на тежината, на пример, се потесно поврзани со болеста - особено ако се откриени кај пациенти околу шест месеци пред дијагнозата - додека други како дијабетес тип 2, анемија или воспаление на панкреасот обично се наоѓаат порано.

-Ракот постепено се развива во човечкото тело, често во текот на многу години и прилично бавно, додека болеста не завладее, вели Крис Сандер, истражувач во студијата и водач на лабораторија која работи на Одделот за системска биологија на Харвард.

-Системот за вештачка интелигенција се обидува да учи од знаците во човечкото тело кои можат да се однесуваат на таквите постепени промени. Сега е рано за ова бидејќи системот за вештачка интелигенција може да прави разумно точни предвидувања, но во моментот не може да идентификува механизми или причински настани, додава тој.

Најефективниот алгоритам покажал дека од првите 1.000 најризични пациенти над 50 години, околу 320 ќе развијат рак на панкреас. Моделот е помалку прецизен кога се обидува да го предвиди ракот на панкреасот во подолги временски интервали во споредба со пократките и за пациенти помлади од 50 години.

Студијата покажа дека ефективното предвидување во реалниот свет ќе се потпира на квалитетот на медицинската историја на пациентите. Идните алатки за скрининг на рак на панкреас засновани на вештачка интелигенција ќе треба да бидат обучени за специфични податоци од локалното население.