Попладневната дремка води кон предвремена смрт?!

Кратката попладневна дремка ќе успее да ве освежи и одмори на краток рок, но со текот на времето оваа навика би можела да влијае на зголемена можност за предвремена смрт речиси за една третина, тврдат научниците од британскиот универзитет Кембриџ.

Во истражувањето, чии резултати се објавени во списанието American Journal of Epidemiology, учествувале 16.000 возрасни Британци, кои дале согласност да бидат дел од големиот проект поврзан со испитување на причините за развој на карцином за прериод од 13 години.

Оние кои се навикнале секојдневно после пладне да отспијат по еден час или подолго, биле поподложни на потенцијален развој на болести на белите дробови, како што се бронхитис, емфизем или пневмонија, како и ризик од предвремена смрт од респираторни болести, во однос на оние кои спијат само во текот на ноќта. Попладневната дремка, како што воочиле научниците, може да влијае на појава на бројни воспаленија во организмот.

Во склоп на овој проект, учесниците на истражувањето биле задолжени редовно да ги известуваат експертите за нивните спијачки навики поврзани со спиењето. По обработка на податоците, британските научници утврдиле дека кај луѓето кои секојдневно попладне спијат помалку од еден час, шансите за предвремена смрт се поголеми за околу 14 проценти, а оваа бројка се зголемува на 32 проценти доколку попладневната дремка трае подолго од еден час.

Но, професорот Џим Хорне од Центарот за истражување на соништата, на универзитетот Loughbourough, за Daily Mail изјавува дека кај повеќето луѓе, попладневната дремка сепак нема да остави негативен ефект. Тој не се согласува во потполност со неговите колеги и тврди дека постои можност дел од луѓето кои биле опфатени со истражувањето претходно веќе да пателе од сериозни заболувања на белите дробови, а попладневната дремка да не е клучниот фактор во резултатите.