Клер Алана Форд од Хемфшир е прекрасна 22-годишна манекенка. Но, оваа девојка е многу поразлична од останатите. Таа постојано се бори и не дозволува да ја победи ретката болест заради која губи контрола над мускулите и која ја претвора во „марионета“.
Оваа споредба не е случајна бидејќи болеста миастенија гравис има токму ваков прекар. Станува збор за автоимуна болест која е проследена со замор и слабост на скелетните мускули, а се појавува како резултат на пореметување на врската помеѓу нервите и мускулите.
- Понекогаш ми се случува да си ја средувам косата и одеднаш да почувствувам слабост во рацете и тие едноставно да ми паднат покрај телото, открива Клер.
Симптомите се јавуваат често и ја исцрпуваат оваа убавица. Од одење на улица до пад потребни се само неколку секунди.
Клер со мода започнала да се занимава на 17-годишна возраст, а набрзо потоа се појавила болеста. Одејќи по пистата, се случувало таа да почувствува огромна слабост. Во тоа време одела и на балет, па заморот го препишувала на бројните обврски. Кога забележала дека симптомите не престанувале, таа побарала лекарска помош, па по неколку погрешни дијагнози, се дошло до вистинската.
- На крајот дознав дека имам миастенија гравис, болест за која никогаш претходно немав слушнато, вели Клер.
На почетокот била престрашена, а потоа решила дека сака да има нормален живот, и покрај болеста. Тоа навистина и’ успева до одредена мера. Со редовна терапија, таа продолжила да се занимава со манекенството.
Но, неретко се случувало луѓето со кои таа соработува да немаат разбирање за нејзината состојба и нејзиниот замор да го заменат со мрзеливост.
- Понекогаш ми е тешко кога заради болеста испуштам некои работи, но тоа воедно ме мотивира да бидам уште поистрајна.
Клер е член на модна агенција во Лондон, а би сакала да зачекори на модните писти во Америка.