Светлината е една од примарните работи кои му овозможуваат на човекот да функционира ефективно и ефикасно. Меѓутоа, поголем дел од неа не е воопшто видлив за нас.
Светлината или електромагнетската радијација, е широк спектар од кој само мал дел е видлив со голо око и тој е познат како видлив спектар. Останатите региони кои вклучуваат радио бранови, микро бранови, терахерцна радијација, инфрацрвена и ултравиолетова светлина, рендгенски и гама зраци – сите тие се невидливи за луѓето.
Во 1800 год., Фредерик Вилијам Хершел ја открил инфрацрвената светлина – дел од инфрацрвените зраци се термални, што значи можеме да им ја почувствуваме топлината но не и да ги видиме, а исто како и оние на видливата светлина, инфрацрвените зраци може да бидат рефлектирани, прекршени, апсорбирани и пренесени.
Сега, тим научници од Philipps-Universität Marburg од Германија развиле супстанца кој ја трансформира инфрацрвената светлина во видлива светлина, а за потребите на експериментот била дизајнирана структура во форма на дијамант направена од сулфур и калај, премачкана со специјална органска супстанца која е стабилна на воздух и термално стабилна до 300°C. Името на оваа супстанца е и нејзината хемиска формула, т.е [(RdelocSn)4S6](Rdeloc=4–(CH2=CH)–C6H4) :) Потоа, врз структурата биле испукувани инфрацрвени ласери, чија бранова должина на зраците била променета од молекулите од супстанцата, преку кој што процес тие станале видливи.
Научниците сметаат дека ова откритие, покрај во системите за проекција, ќе направи напредок и во технологијата на насочена илуминација (која се користи, на пример, во напредни вооружени системи кои користат високо енергетски ласери).