Во нова студија објавена во журналот Nature Biotechnology, истражувачки тим од Универзитетот во Бостон на чело со синтетичкиот биолог Вилсон Вонг успеал да претвори клетки од цицачи во биокомпјутери способни да вршат комплексни пресметки. Ова им успеало со користење на гени од клетки од човечки бубрег.
За потребите на студијата, било дизајнирано генетско коло со помош на постоечка машинерија во клетките наречена промотер, во кои биле внесувани 4 дополнителни парчиња ДНК дизајнирани за создавање на зелен флуоресцентен протеин (GFP) кој ја осветлува клетката кога таа се „вклучува“ преку одреден лек.
Со оваа техника, Вонг и неговиот тим успеале да создадат 113 различни кола со 96.5% успех. Наголемо достигнување било создавањето на коло кое можело да врши една од 16-те логички операции.
Во суштина, компјутерот е машина која процесира информации преку разни пресметки – колку неговите кола се помоќни, толку покомплексни пресметки може да извршува. Слично на тоа, генетски модификуваните клетки кои функционираат како миникомпјутери можат да бидат повеќе или помалку моќни, во зависност од нивниот инженеринг.
Претходно, други истражувачи исто така имале создадено генетски модификувани органски материјали, како на пример создавање на клетки кои светат кога нивото на кислород ќе падне под одредена бројка.
Тимот на Вонг сега засега нема направено клетки кои би можеле да извршуваат компјутерски процеси кои би биле корисни, но доказот дека овој концепт функционира отвара пат за создавање на покомплексни биокомпјутери.
Според некои научници, потенцијално би можеле генетски да ги модифицираме Т-клетките во имунолошкиот систем за да отстрануваат тумори детектирани преку биомаркери. Овој метод би ја подобрил и способноста за генерирање на ткива по потреба кои би ги менувале оштететните делови од телото.