Користејќи го инфрацрвениот Spitzer Space Telescope на NASA, астрономите откриле нова егзопланета со состав сличен на оној на земјата, но далеку поголема и поврела.
Наречена „55 Cancri e”, оваа „супер-Земја“ се наоѓа во систем оддалечен 40 светлосни години од нас. Таа е дупло поголема од Земјата и има 8 пати поголема маса, а околу матичната ѕвезда орбитира секои 18 часа и, како и нашата Месечина, спрема неа е цело време свртена само со едната страна.
Според термичката мапа која била изработена со помош на телескопот, се испоставило дека оваа планета има две „лица“ – едно студено и едно топло. Страната која не е свртена спрема ѕвездата (студената) е со температура од 1100 Целзиусови степени, што е потопло од точката на топење на многу метали, додека „сончевата“ страна е со температура од 2500 Целзиусови степени. Колку за споредба, Венера, која е најтоплата планета во нашиот сончев систем, има температура на површината од 462 Целзиусови степени.
Астрономите сметаат дека „сончевата“ страна е всушност огромен океан од стопена магма, додека темната е создадена од оладена, цврста лава. Интересен факт е што топлината од едната страна не преминува на другата, најверојатно поради тоа што атмосферата на потоплата страна е буквално „испржена“. Според анализите на атмосферата (каде што ја има), таа се состои претежно од водород и хелиум, исполнета и со водороден цијанид.