„Армија“ од 5000 малечки роботи, под водство на научниците од Lawrence Berkeley National Laboratory, ќе имаат задача да ја набљудуваат вселената 11 билиони години назад во времето, и истата да ја мапираат.
Овие цилиндрични роботи со должина од 25cm и ширина колку еден прст, ќе ги имаат вперено своите фибер-оптички кабли кон светлината на околу 35 милиони галаксии, со цел да изработат огромна 3D мапа на небото.
Оваа мапа треба да помогне за подетално осознавање на карактеристиките на галаксиите, ѕвездите и квазарите настанати во првите 400.000 години по Big Bang-от и што е најважно, колку бргу тие се движат подалеку од нас. Сите овие податоци ќе им дадат на научниците нов увид во еволуцијата на галаксиите, темната материја, како и на природата на темната енергија која е двигател на забрзаната експанзија на универзумот.
Проектот е наречен DESI (Dark Energy Spectroscopic Instrument), и неговата инсталација ќе започне наредната година во 4 метарскиот телескоп во Kitt Peak National Observatory, а ќе почне да се употребува во јануари 2019-та.