Тим истражувачи на чело со Charles Bombardier, иноватор од Монтреал, објавил концепт за хипотетички вселенски воз наречен Solar Express кој би можел да пренесува патници и товар помеѓу планети побргу отколку кои било постоечки системи.
Замислата е Solar Express да се движи со 1% од брзината на светлината, односто 3000 километри во секунда – со оваа брзина, патот помеѓу Земјата и Марс би се поминувал за помалку од 2 дена.
Возот би се состоел од серија цилиндри, секој од нив во просек долг 50 метри, а шест од овие цилиндри (кои би функционирале како вагони) би биле меѓусебно споени во права линија и така би патувале низ вселената.
За лансирањето, кое се смета за најскапиот аспект на вселенските патувања, Solar Express би користел ракетни мотори, а потоа би ја користел гравитацијата на небесните тела за да добие на брзина, без потреба од дополнително гориво. Покрај тоа, на него би биле инсталирани голем број на соларни панели кои би се користеле за собирање на соларната енергија која со помош на ласери би била пренесена во суперкондензаторите.
Како извор на вода ќе се користат кометите и малечките месечини, а водата ќе ја користат патниците на возот или ќе се транспортира до други станици. Водата ќе се користи и за креирање на водород и гориво, но главниот погонски систем треба да биде во форма на јонски мотори.