Во 2015 и 2016, NASA спроведе уникатен експеримент врз астронаути близнаци, каде што едниот бил набљудуван додека бил во вселената, додека другиот истовремено бил набљудуван на земјата. Сега се објавени првичните резултати од оваа студија.
Експериментот ги вклучувал астронаутите Скот Кели и неговиот брат Марк, поранешен астронаут. Скот поминал една година во Интернационалната Вселенска Станица (ISS) – таму бил помеѓу март 2015 и март 2016, за кое време и врз двајцата биле вршени тестови за да се споредат нивните меѓусебни генетичките разлики.
Една од поважните причини за оваа студија било да се види како долготрајниот престој во вселената влијае на човечкото тело, бидејќи тоа ќе биде од круцијална важност за идните долготрајни мисии, како што се оние кои ќе вклучуваат пат до Марс.
Прелиминарните резултати кои биле презентирани на 26 јануари покажале дека теломерите во телото на Скот израснале подолги отколку оние на неговиот брат, што било изненадување за научниците кои го очекувале спротивното.
Инаку, теломери се „капачиња“ на рабовите на хромозомите кои го заштитуваат работ од распаѓање или од фузија со соседните хромозоми.
Нивната должина се вратила на нормала откога тој се вратил на Земјата, а причината за тоа сè уште е непозната – таа се испитува во посебна студија која треба да истражи што се случило, и треба да е комплетирана во 2018-та.
Промени биле забележани и во ДНК-то на близнаците, микробиомите во нивните стомаци и сл.
Првите официјални рецензирани документи од оваа студија ќе се појават при крајот на оваа, или почетокот на наредната година.