Од NASA откриле нови детали во врска со нивниот нов план повторно да испрати луѓе на Месечината во наредната декада.
На настан одржан во нивниот штаб во Вашингтон, тие објавиле дека одбрале 9 американски компании на кои ќе им биде понудено да ја изготват мисијата за враќање на Месечината, која би вклучувала лансирање на ракета со различен товар од Земјата и слетување на површината на нашиот сателит.
Меѓу овие компании се Astrobotic Technology, кои се надеваат дека во 2019-та на Месечината ќе испратат нивен ровер и Firefly Aerospace, кои работат на малечка ракета за лансирање во Вселената.
Од NASA се надеваат дека ќе изградат вселенска станица блиску до Месечината наречена DSG – Deep Space Gateway, која би требало да ја замени ISS -Интернационалната Вселенска Станица во наредната декада.
Секоја од овие 9 компании во следните 10 години ќе биде подобна за финансирање од фондот кој ќе располага со 2.6 милијарди долари, но не е познато колкав дел ќе и припадне на секоја.
Првата мисија која е дел од ова финансирање би можела да се случи уште во 2019-та, иако пореалистично е дека тоа ќе биде во 2020-та, а сè уште не е познато што NASA планираат да лансираат.
Според NASA, овие рани мисии ќе овозможат важно демонстрирање на технологијата која ќе се употребува во идните мисии потребни за луѓето повторно да се вратат на површината на Месечината, како и да ја припремат агенцијата за испраќање на астронаути кои би го истражувале Марс.