Со конвенционалните методи, за да стигнеме до најблискиот ѕвезден систем Алфа Кентаур би ни требале од 19 000 до 81 000 години.
Поради оваа причина, многу теоретичари сметаат дека човештвото треба да користи т.н „генерациски бродови“ за да истото се шири низ разните ѕвездени системи.
Еден таков проект би се соочил со многу предизвици, од кои едниот е колкаво треба да биде леталото за на него да може да опстане мулти-генерациски екипаж.
Во една нова студија водена од Фредерик Марин од астрономската опсерваторија во Стразбур и Камил Белуфи, физичар од научната стартап компанија Casc4de, интернационални научници го поставиле токму ова прашање за да одредат колкав простор би бил потребен за тоа.
Тоа било пресметано со специјално создаден софтвер од самиот Марин, со името HERITAGE („наследство“)
За потребите на анализата, било одредено дека за да се оствари мулти-генерациска мисија до друг ѕвезден систем се потребни минимум 98 луѓе, без да има ризик од генетски пореметувања и останати негативни ефекти поврзани со имањето односи со роднини.
Потоа, било заклучено дека на бродот би морало да постои можност за растење на храна, бидејќи на било која друга храна која би се пренесувала по одредено време би и поминал рокот на траење.
Во предвид биле земени и калориските потреби на екипажот за да се пресмета колку храна би било потребно да се создаде во текот на секоја година, а во пресметките на симулациите биле вклучени и антропоморфните податоци за да се одреди колку калории би се консумирале според староста, тежината, висината, нивото на активност и останатите медицински податоци на патниците.
Според тоа, големината на бродот, продукцијата на храна и бројот на жители на него се суштински поврзани.
Крајните резултати покажале дека за релативно голем екипаж (од 500 луѓе) кои би се хранеле со балансирана исхрана која би била растена на самиот брод, неговата големина би требало да биде минимум 224 метри (радиус), а 320 метри должина. Бидејќи ќе бидат потребни и останати простории освен оние за растење на храна, како што се контролните соби, генераторите за електрицитет, мотори и слично, таа големина би се дуплирала.
Дури и една толку голема структура би била помала од сегашната највисока зграда во светот – Бурџ Халифа (висока 828 метри).
Оваа студија дава увид во вистинската можност за креирање на вакви генерациски бродови, а нема сомнеж дека за меѓуѕвездена мисија би ни била потребна масовна посветеност во однос на времето, енергијата и ресурсите потребни за еден таков проект.