Австралиската вселенска агенција планира програма со која би собирала вода и останати ресурси на Месечината.
Лунарна вода е вода која постои на Месечината - течната вода не може да опстои на нејзината површина, а водената пареа се распаѓа на сончева светлина и водородот од неа се губи во Вселената. Уште од 1960-тите, научниците заклучиле дека водениот мраз може да преживее во студените кратери на половите на Месечината кои се перманентно во сенка, а водени молекули се детектирани во тенкиот слој гасови над нејзината површина.
Доколку оваа вода може да се собира во Вселената наместо да треба да се пренесува од Земјата, Месечината би можела да стане еден вид на „космичка станица за напојување“ за мисии кон Марс и подалеку.
Австралиската вселенска агенција е стара помалку од една година, но тие сметаат дека би можеле бргу да развијат нова технологија која најбрзо би почнала да се употребува на Месечината. Земјата веќе има значително индустриско искуство во собирање ресурси од далечни локации, и во развивање на автоматизирана и минијатуризирана технологија за таа намена.