Планета формирана од остатоците на нејзината матична ѕвезда

Новооткриена планета има 13 пати поголема маса од онаа на Јупитер и орбитира околу необичен бинарен систем KIC 10544976 составен од ѕвезди од типот црвено и бело џуџе, а постои можност истата да е создадена од материјалот кој ѕвездата претходник на белото џуџе го исфрлала додека умирала.

Покрај белото џуџе орбитира ѕвезда од типот црвено џуџе која има 39% од масата на Сонцето, а секоја од нив орбитира околу другата 8.4 часа.

По неколку години опсервирање астрономите забележале дека во тајмингот на орбитите постојат варијации, што ја отвара можноста тие да се предизвикани од планета чија гравитација влијае врз орбитите на ѕвездите.

Варијациите се конзистентни со објект кој има најмалку 13.4 пати поголема маса од онаа на Јупитер и орбитален период од 17 години.

Една од теориите е дека е возможно таквата планета да се формирала по нормален пат (истовремено со ѕвездите) и да ја преживеала трансформацијата на едната од ѕвездите бидејќи била доволно оддалечена од неа. Друга теорија е дека планетата се создала од материјалот исфрлен од ѕвездата која умирала, пред да се претвори во бело џуџе.

Астрономите веруваат дека Giant Magellan телескопот кој сè уште се конструира би можел да е способен директно да ја види планетата, со што би се открило која од овие теории е вистинската.