Јапонската сонда Hayabusa2 успешно собра материјал од под површината на астероидот Ryugu, по комплетирање на второто успешно слетување на овој мал објект.
Ова е прв пат да се собере подземен примерок од вселенски објект подалеку од Месечината, а истиот ќе биде донесен на Земјата следната година. Астероидите останале непроменети милијарди години, па така анализирањето на овој материјал би можело да ни отвори еден вид прозорец кон минатото на Сончевиот Систем.
Во април годинава, сондата испукала мал проектил со тежина од 2.5 килограми, користејќи 4.5 килограми експлозивно полнење, од далечина од 500 метри од местото на ударот. Проектилот креирал кратер со дијаметар од околу 2 метри, а сондата не слетала во него туку во област на околу 20 метри од неговиот центар, од каде биле собрани примероци од материјалот кој бил исфрлен со експлозијата.
Пред да го напушти астероидот, сондата (подоцна овој месец) ќе остави ровер на неговата површина, со чија помош ќе продолжиме да го анализираме до крајот на оваа година.
Сондата ќе навлезе во орбита блиску до Земјата во декември 2020-та, кога ќе го испушти примерокот кој ќе патува низ атмосферата и ќе слета некаде во Австралија. Се очекува сондата да остане со доволно гориво за повторно да се испрати во длабоката вселена да набљудува некој друг објект блиску до Земјата во иднина.