NASA за јавноста објави прецизна 3D визуелизација на површината на Месечината.
„CGI Moon kit” (пакет за креирање на компјутерски слики од Месечината) се состои од податоци од лунарниот орбитер на NASA, кој веќе 10 години кружи околу Месечината, забележувајќи топографски податоци.
Со помош на овие податоци била креирана прецизна 3D мапа на Месечината, која агенцијата ја објавила и ја ставила на располагање на јавноста, конкретно за 3D артистите, но и за останатите визуелни дизајнери кои ќе можат да ја користат во било која форма на визуелна уметност за креирање на фотореалистичен модел на Месечината.
Инаку, ресурсите од орбитерот во почетокот биле наменети да бидат на располагање исклучиво на NASA, но по неколку добиени барања, било решено тие да се на располагање на јавноста.
Орбитерот е опремен со камера која функционира како скенер, креирајќи слики линија по линија, а има и ласерски алтиметар кој користи ласерски пулсеви за детектирање на димензиите на Месечината.
Пакетот е бесплатен за превземање и содржи разни видови на податоци и слики, како на пример „displacement“ мапа која ја визуелизира топографијата преку боја.