Потврдено постоење на планети како „шеќерен памук“

Нови опсервации со вселенскиот телескоп Хабл потврдиле постоење на „шеќерен памук“ планети – млади егзопланети со големина на Јупитер кои имаат една стотинка од неговата маса.

Овие објекти се многу ретка и уникатна класа на млади планети, а ништо слично на нив не постои во нашиот Сончев Систем. Тие имаат многу мала густина (поради што им е даден описот дека изгледаат како да се од шеќерен памук), а новите анализи на 3 такви планети кои орбитираат околу ѕвездата Kepler 51 (која е слична на нашето Сонце, а се наоѓа на 2600 светлосни години далечина од нас) сугерираат дека тоа можеби е привремена фаза на одредени планети.

Тие биле за прв пат идентификувани во 2014-та, а со последните опсервации е потврден нивниот состав. Истражувачите од универзитетот на Колорадо проценуваат дека сите три планети имаат густина помалечка од 0.1 грам на кубен сантиметар волумен, што е скоро идентично на онаа на шеќерниот памук.

Тимот истражувачи верува дека овие 3 планети биле формирани далеку од нивната ѕвезда, а потоа почнале да се движат кон неа. Моделите сугерираат дека системот е сè уште во неговиот зачеток и ќе продолжи да се менува во следните неколку милијарди години.