Истражувањето на ледените океани на далечните месечини може да ни помогне во потрагата по вонземскиот живот, но пред NASA да испрати ровер-подморница во студените води на Европа или Енцелад, истата ја тестираат на Антарктикот.
BRUIE (Buoyant Rover for Under-Ice Exploration) моментално е на пат кон австралиската истражувачка станица Кејси на Антарктикот, каде ќе врши разни тестови на инструментите и ќе се тестира неговата способност да истрае во ледените услови во неколку месечни периоди.
Инженерите го имаат дизајнирано BRUIE да го истражува регионот каде течната вода се граничи со мразот, области во кои шансите за постоење на некои форми на живот се најголеми.
Повеќето подморници од овој вид имаат потешкотии во истражување на таквите области каде океанските струи можат да предизвикаат тие да се удрат и оштетат, но BRUIE „лебди“ во водата и останува закотвен спроти мразот, па така струите не влијаат премногу на него.