Астронаутите кои живеат на интернационалната вселенска станица (ISS) успеале успешно да израснат марула која е безбедна за јадење, што би можело да го отвори патот кон снабдување со свежа храна на идните мисии наменети за далечни вселенски истражувања.
Иако салатата била израсната под различни услови во споредба со оние на Земјата, како што се пониската гравитација и поинтензивната радијација – таа била безбедна за јадење и хранлива скоро колку и земјоделските култури на Земјата.
Астронаутите на ISS помеѓу 2014 и 2016 соработувале со истражувачите од вселенскиот центар Кенеди за да ја тестираат способноста за растење природни продукти во вселената, а марулата била израсната од стерилизирано семе ставено во комора креирана од NASA (наречена Veggie) опремена со LED осветлување, систем за наводнување, и систем за надгледување на условите како температурата, јаглеродниот диоксид и влажноста на воздухот.
Овие податоци потоа биле испраќани на научниците на Земјата кои таквите услови ги имитирале во Veggie комората, за да се споредат резултатите.
И на двете локации (Земјата и ISS) марулата растела во период од 33 до 56 дена, а хемиските и биолошки анализи покажале дека онаа растена во Вселената имала сличен состав до таа од Земјата, иако во некои тестови била побогата во калиум, натриум, фосфор, сулфур и цинк.
Некои плодови имале и феноли, молекули кои имаат антивирусни, антиканцерогени и антивоспалителни карактеристики.
Марулата можеби нема преголема нутрициона вредност, но со ваквите истражувања ќе можат да се идентификуваат видовите на овошја и зеленчуци кои успешно би можеле да се растат во вселената и кои би биле корисни за надополнување на постоечката исхрана на астронаутите која моментално се состои претежно од суво овошје, чоколадо, путер од кикирики, кокошкино и говедско месо – сето тоа замрзнато, загреано и стерилизирано за да трае подолго.