Во интернет продавницата Star Trek се појави гаџет кој веруваме дека ќе го привлече вниманието на секој фан на легендарниот SF ТВ серијал, под називот Star Trek The Original Series Communicator Bluetooth Handset.
Со други зборови се работи за „официјална“ реплика на оригиналниот комуникатор од првиот Star Trek серијал со легендарните Spock, Kirk, Uhur, McCoy, херои кои се најзаслужни за култниот статус на целата франшиза.
Овој комуникатор во основа е рачен безжичен микрофон со звучник за паметен телефон, кој се спојува преку Bluetooth и овозможува примање на повици како и репродукција на музика.
Репликата на легендарниот гаџет ја изработи компанијата The Wand Company, која го скенираше оригиналниот ST TOS комуникатор Alpha Hero и потоа се потруди дизајнот да биде скоро идентичен на оригиналот, а направен е од лиено железо, алуминиум и ABS пластика.
Со комуникаторот се добива и магнетска станица за безжично полнење, на кое е доволно само да го ставите, а кое исто така се вклопува во Star Trek моментот.
Ако успеавме да ви го привлечеме вниманието, треба да знаете дека ова задоволство ќе ве чини 150 долари, но има време да почнете да собирате пари бидејќи испораката ќе започне дури од следната година.