Една од пречките во „мрежното општество“ е што сè уште не е постигнато сите уреди да комуницираат еден со друг. Начинот на кои објектите и уредите како апаратите за домаќинство, контактните леќи, кредитните картички, па дури и телесните импланти се конектираат со компјутерите, часовниците и смартфоните, ја одредуваат ефективноста на овие уреди. Поради тоа, секогаш има побарувачка и потреба од нови методи кои ќе ја подобрат оваа комуникација.
Сега, истражувачи од University of Washington откриле нов безжичен комуникациски метод кој им овозможува на малечките уреди за носење да комуницираат со смартфоните, користејќи многу малку енергија.
Овој метод, детално опишан во студија презентирана на SIGCOMM 2016 конференцијата во Бразил, ги конвертира сигналите помеѓу Bluetooth, WiFi или ZigBee и им овозможува на мали уреди како што се „smart“ контактни леќи да комуницираат со други уреди користејќи само неколку микровати енергија. Ова би им дозволило на леќите да функционираат како фитнес тракери кои во реално време би ги испраќале податоците до смартфоните.
Истражувачите ја базирале нивната interscatter технологија на backscatter техниката, каде што уредите меѓусебно си ги испраќаат информациите рефлектирајќи веќе постоечки сигнали. Оваа технологија им овозможува на радијата да се однесуваат и како извори и како примачи на рефлектираните сигнали – на пример, interscatter може да ги користи Bluetooth сигналите да креира WiFi преноси.