Електронските уреди кои што се носат стануваат се поприсутни на пазарот, но и помалечки последниве неколку години. Но за жал многу од нив, да не речеме сите, имаат иста слаба точка: батеријата.
Без разлика дали се работи за батерија која што се полни, или може и да се менува, таа се троши за релативно брзо време а без неа уредите се ништо повеќе од парче метал или пластика кој го носите на зглобот.
Matrix PowerWatch е нешто поразлично, бидејќи според неговите креатори, не само што ги има сите вообичаени функции на фитнес тракер (броење на чекори, потрошени калории, надгледување на спиењето и сл.), туку е напојуван од телесната топлина.
Тоа функционира така што термоелектричните генераторски кола ја користат температурната разлика помеѓу двете страни на часовникот за да генерираат енергија. Часовникот се гаси самиот (т.е влегува во “sleep mode”) кога не се носи, и ја користи интерната батерија за да го помни точното време и датум.
Компанијата поставила Indiegogo кампања преку која што Matrix PowerWatch ќе може да се купи за $129, а испораките се очекуваат во 2017-та.