Елон Маск ги објави најновите резултати од развојот на Neuralink, невротехнолошки стартап кој би креирал поврзаност помеѓу луѓето и компјутерите.
Во говорот пред калифорниската академија на науките во Сан Франциско, тој откри дека имплантот бил тестиран врз мајмун, кој му овозможувал со мозокот да контролира компјутер, а исто така поднел барање за одобрување на тестирање на уредот врз луѓе.
Како што Елон објасни, луѓето веќе се на некој начин поврзани со дигиталните системи, со користење на смартфон или лаптоп, со тоа што внесот на податоци се одвива преку тапкање со прстите, што значи дека протокот на информации е релативно бавен. Со имплантот, таа комуникација помеѓу мозокот и дигиталниот систем би била скоро инстантна, до степен да компјутерот стане продолжување на нашата сопствена когниција.
Уредот се состои од малечка сонда составена од ултратенки флексибилни влакна (потенки од влакното на косата), кои можат да детектираат активност во невроните и ефективно да го „читаат“ мозокот, иако само мал дел од него.
Дури е развиен и робот кој може да го имплантира уредот во животни (првенствено глувци), под надзор на неврохирург. Според студијата биле извршени најмалку 19 операции на глувци од страна на роботот, со успешност во 87% од случаите.
Иако Neuralink треба да помине уште многу долг пат додека да има било каква практична намена, сепак надежта е дека оваа технологија би можела да се користи за третирање на бројни мозочни повреди и болести, вклучувајќи ги и парализата и Алцхајмеровата болест.
Елон се надева дека еден ден ќе имаме целосна поврзаност помеѓу мозокот и машините и дека би можеле да постигнеме еден вид на симбиоза со вештачката интелигенција.