Во Мексико загадувањето на воздухот е на исклучително високо ниво. Од време на време Мексико Сити е парализиран од чадот од автомобилите, индустриите, па дури и од блискиот вулкан Попокатепетл.
За да се изборат со ова, група инженери од BioMitech дале предлог за намалување на проблемите со загадувањето, во форма на BioUrban – еден вид на вештачко дрво кое, како и природните, го апсорбира загадувањето и испушта прочистен воздух, а кое би било исклучително корисно за пешаците, постарите лица и велосипедистите.
BioUrban има метална структура и содржи систем способен за инхалирање на контаминираниот воздух преку микро алги, кој со помош на технологијата и преку фотосинтеза го прочистува. Овој процес се врши секојдневно, а според неговите креатори, едно BioUrban роботско дрво врши работа колку 368 вистински дрва.
И покрај сето тоа, ова 4-метарско роботско дрво нема намера да ги замени вистинските, туку само да ги надополнува.
Се планира BioUrban дрвата да бидат инсталирани во поурбани средини каде има многу пешаци, возила, велосипедисти и јавен превоз. Првото вакво дрво ќе биде инсталирано во Пуебла, Мексико, а ќе чини околу $50 000.