Atmos Faceware на компанијата AO е маска за прочистување на воздух изработена со најнова технологија за отстранување на штетните материи од воздухот кој го дишеме, која кога ќе се појави во продажба ќе чини околу $350, а со неа ќе доаѓаат 4 дополнителни филтри.
Се работи за проѕирна маска која се става на лицето и ги покрива носот и устата, а во неа има вградено систем за вентилација кој се адаптира на дишењето на личноста која ја носи.
Маските за филтрирање на воздухот се популарни во многу делови од светот како Кина и Индија, од кои Индија има најзагаден воздух во светот. Во Кина, пак, вообичаено се носат хируршки маски со кои луѓето се обидуваат да спречат да заразат некого, а носењето на истите се смета за учтиво доколку сте болни.
Од AO тврдат дека нивната маска нуди 50 пати подобра заштита во споредба со конкуренцијата, што било заклучено со независни тестирања во технолошкиот универзитет во Оукланд. Маските прочистуваат 240 литри воздух во минута, а филтрите траат околу 1 месец, во зависност од квалитетот на воздухот. Батериите, пак, траат околу 5 часа, во зависност од капацитетот на белите дробови, физичката активност и квалитетот на воздухот кој што се дише.
Кај стандардните маски белите дробови го влечат воздухот низ филтерот на маската пред да навлезе во нив, додека пак Atmos маската тоа го прави за корисникот, преку туркање на воздухот низ филтрите со помош на вентилатори напојувани со литиум-јонската батерија.