NEON е „вештачки човек“ на Samsung кој еден ден би можел „научната фантастика да ја претвори во реалност“, претставен на CES 2020. Се работи за виртуелно битие кое изгледа и се однесува како човек, со способност да покажува емоции и интелигенција.
За разлика од AI асистентите, NEON „луѓето“ не се наменети да бидат ботови кои знаат сè, туку се дизајнирани да разговараат и сочувствуваат како вистински луѓе.
Инаку, проектот е дело на лабораториите STAR, независен огранок на Samsung.
Секој NEON е напојуван од технолошката платформа CORE R3, тренирана да изгледа, се однесува, и има интеракција како вистинските луѓе во реално време. Иако овие „вештачки луѓе„ личат на вистинските луѓе според кои се моделирани, секој дигитален карактер има своја уникатна личност и може да покажува нови изрази на лицето, движења, и дијалози.
Од NEON сугерираат дека, во блиска иднина, секој би можел да лиценцира или да се претплати на NEON како претставник на услугите кои ги нуди, финансиски советник, лекар и сл. Подоцна, тие би можеле да работат и како ТВ водители, па дури и глумци.
На CES 2020 биле претставени вакви AI аватари во „улога“ на студенти, архитекти и стјуардеси и слични, а целта и визијата на нивните креатори никогаш не била да се креира нечија дигитална копија или пак AI верзија на деца или домашни миленичиња.