Компаниите Google и Apple соопштија дека ќе ја забранат употребата на функцијата за следење на локацијата од апликации што се во развој и работат на забавување на ширењето на новиот коронавирус.
Google и Apple, чии оперативни системи опфаќаат 99 отсто од паметните телефони, објавија минатиот месец дека заедно ќе работат на создавање систем за известување на луѓето кои биле во близина на личност позитивна на Ковид-19.
Двете компании објавија дека примарната цел им е приватноста и спречување на владите да користат систем за собирање податоци на граѓаните.
Системот користи bluetooth сигнали од телефонот за да открие средба со заразено лице, но не користи или чува GPS податоци.
Програмерите на овие апликации минатиот месец истакнаа дека е од витално значење да се дозволи употребата на податоци за GPS локацијата во комбинација со нов систем за пребарување контакти, со цел да следат како епидемијата се развива и да го идентификуваат жариштето.